CCCXX.

1421, April 16. Wartha.

Notariatsinstrument über die Verzichtleistung Barbara's, der Wittwe des Voigtes Thomas zu Wartha, und ihrer Söhne auf einen dem Kloster vorenthaltenen Jahrzins in genannter Stadt.

In nomine domini amen. Sub anno nativitatis eiusdem millesimo quadringentesimo vicesimo primo, indictione quarta decima, die vero decima sexta mensis Aprilis hora nonarum vel quasi, in estuario hyemali honorabilis domini Francisci prepositi seu prepositure opidi Wartha Wrat. dioc. pontificatus sanctissimi in Christo patris et domini nostri, domini Martini divina providentia pape quinti anno ipsius quarto, in mei notarii publici infrascripti testiumque presencia subscriptorum ad hoc specialiter vocatorum et rogatorum constituta personaliter honesta domina Barbara relicta Thome advocati ibidem in Wartha, una cum filiis suis Stephano et Johanne sani mente et corpore bonaque deliberacione prehabita, non coacti neque decepti sive per errorem seducti, sed ex certis ipsorum scientiis ac sano consilio omnium suorum amicorum publice proposuerunt recognoscentes, quomodo ac qualiter minus iuste arrestassent monasterium beate Marie virginis in Kamencz pro duabus marcis annui census Polonicalis numeri, quas se ipsis videbatur opinative adhuc habuisse et habere in et supra prefato monasterio in Kamencz et bonis ipsius, supra quibus census duarum marcarum prelibatarum prefata domina Barbara cum pueris suis opinabantur se in reposito ad fideles manus habuisse quondam literam originalem desuper confectam apud venerabilem virum dominum Johannem quondam abbatem in Kamencz pie memorie, tandemque dicta domina Barbara cum pueris suis recognovit, se desuper sano modo et integraliter deliberasse atque debite a fidedignis informata extitisset, quod dicte due marce annui census essent exsolute ac dudum excassate, mox ibidem et statim pretacta domina Barbara una cum filiis suis, videlicet Stephano et Johanne, publice ac libere et omnimode dictarum duarum marcarum annui census abrenuncciaverunt et condescenderunt nunc et in futuro tempore omni, venerabili viro ac domino, domino Nicolao Ekkirsdorff divina miseratione abbati monasterii pretacti in Kamencz suoque conventui inibidem ac singulis ipsorum posteris et successoribus, abrenuncciantes nichilominus unanimiter et concorditer viva voce oraculo omni liti controversie, que nunc et in antea racione dictarum duarum marcarum census seu aliarum singularum causarum extiterint sive extitissent exorti atque oriri potuissent, promittentes et obligantes se sub bona fide manu stipulanti obligacione omnium bonorum suorum mobilium et inmobilium dictum dominum Nicolaum abbatem in Kamencz seu ipsius conventum ac monasterium nunc et de cetero tempore perpetuo pro eisdem causis ac aliis singulis causis, que racione dictarum duarum marcarum inposterum possent emergi, numquam per amplius arrestare, invexare, molestare et fatigare, tam in iudiciis spiritualibus, quam secularibus, sed fieri et esse amici sive boni fautores dicti domini Nicolai abbatis et sui monasterii in Kamencz, prout spectat ad Christi fideles. Supra quibus omnibus et singulis prenominatus venerabilis dominus Nicolaus abbas in Kamencz petiit a me notario publico infrascripto sibi desuper fieri ac confici unum vel plura publicum vel publica instrumentum vel instrumenta. Acta sunt hec anno, indictione, die, mense, hora, loco et pontificatu, quibus supra, presentibus honestis et discretis viris: Nicolao Laurencii advocato in Wartha, Sigismundo Huebener cohabitatore ibidem in opido Wartha Wrat. dioc. et Johanne Teycher doleatore sive concive in Glacz Pragensis dioc. testibus fidedignis ad premissa vocatis specialiter et rogatis.
Signum notarii.
Et ego Maternus natus olim Martini medici de Glacz Prag. dioc. publicus auctoritate imperiali notarius dicte proposicioni, recognicioni et abrenuncciacioni necnon omnibus aliis et singulis premissis, dum sic, ut premittitur, fierent et agerentur, una cum prenominatis testibus presens interfui eaque omnia ac singula sic fieri vidi et audivi et in hanc formam publicam redegi, signo et nomine meis solitis et consuetis consignavi requisitus in fidem et testimonium omnium premissorum.

Or. Perg.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.